Usurbilgo Toponimia

Donostiatik edo Zubietatik gatozela, baso eder bat ikusiko dugu gorri-gorri, Usurbilgo udazkenaren ezaugarri paregabe. Amiri eta Santuenea artean dago, Zubietako bidearen goiko aldean, eta Puelaren azpiko aldean. Haritz gorriak dira (Usurbilen, haritz amerikanoa edo norteko haritza esaten zaio). Nola du izena basoak?

• Nola du izena, Urdaiagan, Ilunbe baserriaren goiko aldean dagoen leize zuloak?
• Nondik datorkio Bugati izena Zubietako baserriari?
• Ermitari eta auzoari, biei esaten diegu San Esteban. Baina, nola esan beharko genioke auzoari?
• Oiardo, kiroldegiaren izena da usurbildar gehienentzat; baina, berez, Irisasiko leku-izena dugu. Kokatzeko gauza izango al zinateke, gutxi gorabehera?
• Zein izen du Santuenetik Txokoalderako bidegorriak igarotzen duen erribera sail ederrak, Berreiartzabarrena baserriaren azpiko aldean?
• Zubietan, non da Gerezieta?
• Zubietamendiren ondotik, Amirierrekan hasita Olaberrietako errekaraino, Aiako eta Orioko mugaraino dagoen mendialde osoak zein izen du?
• Zein da Arbitza eta Berridi artean sortu, Irigoienen ondotik pasa, eta Aliri aldamenean ibairatzen den erreka?
• Saltxipi du izena jatetxeak, baina baserriaren izena nola idatzi beharko genuke forma arautuan?
• Zein etxek betetzen du udaletxe edo herriko etxe funtzioa Zubietan?